Сәтбаев қаласында Кеншілер сарайының алдында қала тұрғындары «Таза Қазақстан» акциясы аясында ерекше экологиялық шараға жиналды. Велосипедпен серуендеп қана қоймай, жол бойындағы қоқысты жинау арқылы қатысушылар спорт пен табиғатты қорғауды біріктірді.
Іс-шараға ең кішкентай қатысушы – небәрі 4 жастағы балақай болса, ең үлкен қатысушы – 32 жастағы азаматымыз болды. Жас ерекшелігіне қарамастан барлығы белсенділік танытып, қаламыздың тазалығы үшін үлес қосты.
Шара барысында қатысушылардың көңіл-күйі көтеріңкі болып, спорттық бәсеке мен экологиялық жауапкершілік үйлесім тапты. Жүлделі орындар мен арнайы номинациялар өз иесін тауып, жеңімпаздар марапатталды.
Нәтижесінде, қатысушылардың күшімен 100-ге жуық қап қоқыс жиналды. Бұл – қала тұрғындарының табиғатқа жанашырлығы мен бірлігінің айқын дәлелі.
«Велошеру – таза қала!» акциясы қаламыздың тазалығын сақтауға, тұрғындардың бірлігін арттыруға және жастар арасында салауатты өмір салтын насихаттауға үлкен үлес қосты!