Сәтбаев қаласында қатты тұрмыстық қалдықтарды шығару қызметін көрсетіп келген «Сәт-Тазалық» жауапкершілігі шектеулі серіктестігімен жасалған келісімшарттың мерзімі аяқталуына байланысты, 2026 жылғы 1 қаңтардан бастап бұл қызметті жаңа компания — «Ұлытау Экосервис» ЖШС жүзеге асыра бастады.
Қаланың санитарлық тазалығын қамтамасыз ету мақсатында жаңа қызмет көрсетуші компания өз жұмысын жоспарлы түрде қолға алды. Қоқыс шығару жұмыстары мерекелік демалыс күндері де тоқтаған жоқ. Атап айтқанда, 1–4 қаңтар аралығында қала аумағынан жалпы көлемі 1 080 текше метр қатты тұрмыстық қалдық шығарылды. Бұл қала тұрғындарына көрсетілетін қызметтің тұрақты әрі үздіксіз жүргізіліп жатқанын аңғартады.
Қатты тұрмыстық қалдықтарды жинау және шығару бойынша нақты жұмыс кестесі бекітілді. «Ұлытау Экосервис» ЖШС қала аумағында қоқыс шығару жұмыстарын күн сайын таңғы 08:00-ден кешкі 19:00-ге дейін атқарады. Қызмет көрсету барысында санитарлық талаптар мен экологиялық нормалар қатаң сақталуда.
Сонымен қатар, тұрғындарды алаңдатқан маңызды мәселелердің бірі — қоқыс шығару тарифіне қатысты жағдай. Жауапты мекемелердің хабарлауынша, қызмет құны өзгеріссіз қалды. Яғни, бұрын қолданыста болған тарифтер сақталып, қала тұрғындары үшін қосымша қаржылық жүктеме қарастырылмаған.
Жаңа компанияның негізгі мақсаты — қала тазалығын сақтау, экологиялық жағдайды жақсарту және тұрғындарға сапалы қызмет көрсету. Алдағы уақытта қоқыс шығару жүйесін жетілдіру, арнайы техникаларды жаңарту және қызмет сапасын арттыру бағытында бірқатар жұмыстарды жүзеге асыру жоспарланып отыр.
Қала әкімдігі мен жауапты мекемелер тұрғындарды тұрмыстық қалдықтарды белгіленген орындарға тастауға және тазалық сақтау талаптарын орындауға шақырады. Ортақ тәртіп пен жауапкершілік — қаланың көркеюі мен экологиялық қауіпсіздігінің кепілі.
