Жұмысшы мамандықтарының ерекшелігі – олардың еңбегі көзге бірден көрініп тұрады. Мысалы, құрылысшы тұрғызған биік ғимарат, жүргізуші жеткізген жүк пен жолаушы, тігінші тіккен киім, ұстаздың немесе дәрігердің күнделікті еңбегін қолдап отыратын негізгі күш – осы қарапайым жұмысшылар. Оларсыз ешбір сала толыққанды дамып, алға баса алмайды.
Жұмысшы мамандықтарының тағы бір артықшылығы – олардың еңбегі ешқашан жерде қалмайды. Қоғамда қандай өзгеріс болса да, адамдарға тұрғын үй, жол, киім-кешек, түрлі құрал-жабдықтар қажет. Осы тұрғыдан алғанда жұмысшы мамандықтары – өмірдің негізін құрайтын, әрқашан сұранысқа ие салалар.
Әрбір адам өз мамандығын сүйсе, шын мәнінде халыққа пайда әкеліп, елдің дамуына үлес қосады. Сондықтан біз жұмысшы еңбегін бағалай білуіміз керек, себебі олардың қолымен қалалар салынып, ел игілігі артып отыр.