2025 жыл – еліміз үшін ерекше мәнге ие жыл. Бұл жыл – Жұмысшы мамандықтар жылы деп жарияланып отыр. Мемлекетіміздің өндірістік, экономикалық, инфрақұрылымдық және әлеуметтік дамуына тікелей үлес қосатын жұмысшы мамандық иелерінің қоғамдағы рөлін көтеру – уақыт талабы.
Жұмысшы – ел тірегі, қоғамның қозғаушы күші. Техника мен технология дамыған сайын, өндірістегі кәсіби шеберлікке деген сұраныс та артып келеді. Электрик, дәнекерлеуші, механик, құрылысшы, сантехник, аспаз, жүргізуші, шаштараз, тігінші, фрезерші, слесарь, оператор, лаборант – осындай көптеген мамандық иелері – күнделікті тұрмысымыздың тірегі.
Мақсатымыз – жұмысшы мамандықтарының мәртебесін арттыру
“Жұмысшы мамандықтар жылы” аясында еліміз бойынша түрлі іс-шаралар, форумдар, көрмелер, байқаулар, кәсіптік бағдар беру жұмыстары ұйымдастырылып, жастар арасында жұмысшы кәсіптерге деген қызығушылықты арттыру көзделіп отыр.
Мектеп оқушыларына, колледж студенттеріне, жұмыссыз жастарға, ата-аналар мен педагогтарға бағытталған арнайы бағдарламалар мен кәсіптік бағыт-бағдар беру жобалары іске асады. Сонымен қатар, өндірістік мекемелер мен колледждердің арасындағы әріптестік байланыстар нығайтылып, дуальды оқыту жүйесін дамыту жұмыстары жүргізіледі.
Неліктен жұмысшы мамандықтары маңызды?
Экономика тірегі – өндіріс, құрылыс, ауыл шаруашылығы, қызмет көрсету салалары білікті мамандарсыз дамымайды.
Жоғары сұраныс – нарықта кәсіби-техникалық мамандықтарға деген сұраныс тұрақты.
Тұрақты табыс – білікті жұмысшы еңбек нарығында бағаланады және жақсы табыс таба алады.
Кәсіпкерлікке жол – жұмысшы мамандықтарын меңгерген азаматтар өз ісін ашуға мүмкіндігі зор.
Заманауи білім – қазіргі заманғы колледждер мен оқу орындары халықаралық стандарттарға сай білім беріп келеді.
Келешек – кәсіптік білімде!
Жұмысшы мамандығын меңгеру – ұят емес, керісінше, мақтаныш. Елін сүйетін, еңбек етуден жалықпайтын, адал жолмен табыс табатын азамат – нағыз патриот. Біз жастарды адал еңбекке, кәсіптік дағдыларды меңгеруге, кәсіби шебер болуға үндейміз.
Елімізде жасалып жатқан барлық игі істер – болашақ жұмысшы буынға сапалы білім беріп, лайықты жағдай жасауға бағытталған.