Қазіргі заманда кез келген мемлекеттің дамуы тек ғылым мен технологияға ғана емес, сонымен қатар жұмысшы мамандардың еңбегіне тікелей байланысты. Өндіріс, құрылыс, ауыл шаруашылығы, көлік және қызмет көрсету салаларында еңбек етіп жүрген жұмысшы мамандар – экономиканың негізгі тірегі.
Жұмысшы мамандар күнделікті өмірімізді жеңілдетіп, қоғамға қажетті жағдай жасайды. Электрик жарықты қосып, дәнекерлеуші құрылыс нысандарын тұрғызса, механизатор егістікте еңбек етіп, жүргізуші жолаушыларды діттеген жеріне жеткізеді. Бұл мамандық иелері болмаса, қала да, ауыл да толыққанды жұмыс істей алмайды.
Бүгінде кәсіби жұмысшы мамандарға сұраныс артып отыр. Тәжірибелі слесарь, құрылысшы, аспаз, дәнекерлеуші, жүргізуші сияқты мамандардың еңбегін ешқандай техника толық алмастыра алмайды. Әсіресе, “қолынан іс келетін” мамандар өндіріс орындарында, зауыттарда және тұрмыстық қызмет көрсету саласында ерекше бағаланады.
Жұмысшы мамандықтарының бірнеше артықшылықтары бар:
Тұрақты еңбек табысы;
Жаңа кәсіп үйрену мүмкіндігі;
Қоғамға нақты пайда әкелу;
Өз ісінің шебері атану.
Жұмысшы мамандар – ел дамуының іргетасы. Олардың қол еңбегінсіз ешбір қоғам өркендей алмайды. Сондықтан жас ұрпақ арасында жұмысшы кәсіптерін насихаттап, беделін көтеру – бүгінгі күннің басты міндеттерінің бірі.