Қаланың көркі мен жайлылығы – әрбір тұрғынның өмір сапасына тікелей әсер ететін маңызды факторлардың бірі. Сондықтан жыл сайын қала аумағындағы саябақтар мен скверлерде орналасқан шағын сәулет нысандарын қалпына келтіру мен жөндеуге бюджеттен арнайы қаражат бөлінеді. Бұл жұмыстар тұрғындарға қолайлы орта қалыптастыруға бағытталған жүйелі шаралардың бір бөлігі болып табылады.
Ағымдағы жылы да пайдаланылу барысында зақымданған нысандарды жөндеу жоспарланып отыр. Қалпына келтіру тізіміне Төлек батыр алаңы, «Салтанат» дүкенінің алдындағы балалар ойын алаңы және басқа да бірқатар маңызды нысандар енгізілген. Жөндеу жұмыстары барысында абаттандыру элементтері қайта жаңартылып, қауіпсіздік пен қолайлылық талаптарына сай ретке келтіріледі.
Мұндай жұмыстар тек инфрақұрылымды жақсартумен шектелмейді. Қалалық ортаны таза әрі ұқыпты ұстау мәдениетін қалыптастыру да – басты бағыттардың бірі. Өкінішке қарай, кей жағдайда вандализм деректері кездесіп жатады. Бұл – ортақ мүлікке немқұрайлы қараудың көрінісі. Сондықтан ақпараттық ресурстар мен әлеуметтік желілер арқылы тұрғындар арасында түсіндіру жұмыстарын жүргізу, қоғамдық мүлікке жауапкершілікпен қарау мәдениетін қалыптастыру аса маңызды.
Қала – бәріміздің ортақ үйіміз. Оның тазалығы мен көркеюі тек коммуналдық қызметтердің ғана емес, әр тұрғынның жауапкершілігіне байланысты. Бірлескен күш-жігердің арқасында ғана біз қаламыздың абаттандырылуын сақтап, барша тұрғындар үшін жайлы әрі қауіпсіз орта қалыптастыра аламыз.
