Брифингтің тақырыбы – су тасқыны кезеңінің басталуы және халықтың қауіпсіздігін қамтамасыз ету шаралары.
Су тасқыны кезеңінің басталуы
Көктемгі су тасқыны – барлық қызметтер мен халықтың ерекше дайындықты қажет ететін маңызды кезеңі. Қазақстан Республикасы Төтенше жағдайлар министрлігінің негізгі міндеттерінің бірі – осы кезеңнің қауіпсіз және апатсыз өтуін қамтамасыз ету.
Бүгінде облыстағы су тасқыны жағдайы тұрақты, алайда су басу қаупі жоғары 11 елді мекен ерекше бақылауға алынған: Ақшагат, 189-разъезд, Ынталы, Қаракеңгір, Жезді, Жыланды, Қарсақпай, Талдысай, Ақтай, Түйемойнақ және Малшыбай.
Су тасқыны жағдайын бақылау
Сарысу, Жаман-Сарысу, Сарыкеңгір, Қаракеңгір, Жезді, Қара-Торғай және Сары-Торғай өзендері, сондай-ақ Кенгір, Жезді және Ақтасты гидротехникалық құрылыстары тұрақты бақылауда. Су тасқыны жағдайын бақылау үшін 8 гидробекет орнатылып, олардың деректері “Тасқын” мониторинг жүйесіне онлайн режимде беріледі.
Облыста су өткізу құрылыстарын тазалау және қар шығару жұмыстары белсенді жүргізілуде. Қазіргі уақытта 291 мың текше метр қар шығарылып, 1 051 су өткізу құрылысының 633-і тазартылды.
Су тасқыны кезеңіне дайындық
- Қажет болған жағдайда, облыс аумағында мал айдайтын 23 орын мен 19 мал қорымы дайындалған.
- Жезді су қоймасында өзен арнасын тазарту мақсатында жоспарлы су ағызу жүргізілуде (21 ақпаннан бастап 11 млн текше метр су ағызылды).
- Су тасқыны қаупіне жедел ден қою үшін жедел штаб құрылып, қалалар мен аудандарда жедел көмек желілері жұмыс істеп тұр.
- Азаматтық қорғау қызметтері күшейтілген жұмыс режиміне көшті.
- Бекітілген іс-қимыл жоспарына сәйкес облыста 200 адам, 85 техника, 10 жүзу құралы және 34 мотопомпа жұмылдырылған.
- Су тасқыны жағдайы нашарлаған жағдайда, 34 218 адамды орналастыруға арналған 44 уақытша эвакуациялық пункт дайындалған.
- Шекаралас облыстармен (Түркістан, Жамбыл, Қызылорда) өзара іс-қимыл жоспары әзірленіп, бекітілген.
Су тасқыны кезеңінің болжамы
“Қазгидромет” мәліметтері бойынша, 16-21 наурыз аралығында облыс аумағында ауа температурасы +13…+18°C дейін көтеріледі. Су тасқыны кезеңінің шарықтау шегі 21-30 наурыз аралығында болады деп болжануда.
Қазіргі уақытта аудандық маңызы бар автомобиль жолдарында еріген қар суының екі тасу оқиғасы тіркелді:
- “Ұлытау-Сарлық” (ені 100 м, биіктігі 10 см);
- Қорғасын ауылында (ені 30 м, биіктігі 15 см). Аталған жағдайлар бақылауда, көлік қозғалысы үзілген жоқ.