Спикерлер ретінде Жезқазған қаласының қорғаныс істері басқармасының тәрбие және идеологиялық жұмыс тобының бастығы, лейтенант Молдабек Таңжарық Манарбекұлы және әскерге шақыру және әскерден тыс жұмыс бөлімінің нұсқаушы-сержанты, кіші сержант Муканова Ботажан Мукановна сөз сөйледі.
Мерзімді әскери қызметке шақырудың көктемгі науқаны басталды
Қазақстан Республикасының Президентінің Жарлығына сәйкес, 1 наурыздан бастап азаматтарды мерзімді әскери қызметке шақырудың көктемгі науқаны басталды. ҚР Конституциясының 36-бабына сәйкес, “Қазақстан Республикасын қорғау – оның әрбір азаматының қасиетті парызы және міндеті”. 2025 жылы еліміз бойынша 42 000-нан астам азамат әскерге шақырылады.
Мерзімді әскери қызметке Қазақстан Республикасының Қарулы Күштері, Ұлттық Ұлан, ҰҚК Шекара қызметі, Төтенше жағдайлар министрлігі және ҚР Мемлекеттік күзет қызметіне азаматтарды шақыру жоспарланған. Жезқазған қаласының қорғаныс істері басқармасы 18-27 жас аралығындағы азаматтарды іріктеу жұмыстарын жүргізуде.
Шақыру қағидалары
Әскерге шақыру процесі мынадай жолдармен іске асырылады:
- Шақыру қағаздарын ұсыну;
- SMS-хабарламалар жіберу.
Әскерге шақырылушылар жан-жақты алдын-ала тексерістен өтеді. Тексеру барысында олардың мінезі, отбасылық жағдайы, қоғамдық жұмысқа араласуы, білімі, мамандығы, денсаулық жағдайы, діни сенімі және соттылық мәселелері қарастырылады. Сонымен қатар, олардың ата-аналарымен жеке кездесулер өткізіледі.
Медициналық тексеріс және комиссияның жұмысы
Әскерге шақырылған азаматтар әскери комиссариатқа келіп, қызметке жарамдылығын анықтау үшін медициналық тексерістен өтулері тиіс. Шақыруды жүргізу үшін жергілікті атқарушы органдар әскерге шақыру және медициналық комиссиялар құрады.
Әр әскер түрлеріне қойылатын талаптар әртүрлі. Мысалы:
- IT мамандықтары бойынша білімі бар жастар әскери-ғылыми взводқа іріктеледі;
- Десанттық және арнайы тағайындалған әскерлерге бойы 170 см-ден төмен емес азаматтар қабылданады;
- Спортшыларға ерекше назар аударылады.
Әскери қызметтің артықшылықтары
Әскери қызметшілер келесі қамтамасыз етулермен қамтылады:
- Тамақтану;
- Киім-кешек;
- Жеке бас гигиенасы құралдары;
- Ай сайынғы ақшалай төлем;
- Медициналық қызмет;
- Пошталық жөнелтулерге жәрдемақы.
Сонымен қатар, орта-техникалық немесе жоғары білім бар әскери қызметшілер 6 ай қызмет өткергеннен кейін келісімшарт бойынша әскери қызметке түсуге құқылы.
Шақырудан кейінге қалдыру және босатылу
Кейбір азаматтар мерзімді әскери қызметке шақырудан кейінге қалдыру немесе толық босатылу мүмкіндігіне ие. Кешіктіру негіздері:
- Отбасы жағдайы;
- Білімін жалғастыру;
- Денсаулық жағдайы;
- Құқық қорғау органдарында алғашқы кәсіби дайындықтан өту.
Әскери қызметтің қауіпсіздігі және әлеуметтік жеңілдіктер
Қорғаныс министрлігі әскери қызметтің қауіпсіздігіне ерекше назар аударады. Әскери прокуратура және әскери полиция органдары салауатты әскери ортаны қамтамасыз ету бойынша тұрақты жұмыс жүргізуде. Әскери бөлімдерде сенім телефондары орналастырылған, олар арқылы сарбаздар кез келген уақытта көмек сұрай алады.
Әскери қызметшілерге мынадай әлеуметтік жеңілдіктер қарастырылған:
- Қызмет барысында және запасқа шыққаннан кейін 60 күнге дейін несиелік демалыс;
- ҰБТ тапсырмай, жоғары оқу орындарына түсу мүмкіндігі;
- Жұмысшы мамандықтары бойынша мемлекеттік куәлік алу;
- Запасқа шыққаннан кейін жұмысқа орналасу мүмкіндігі.
Жауапкершілік
Мерзімді әскери қызметтен жалтарған азаматтарға әкімшілік және қылмыстық жауапкершілік қарастырылған.
Қорғаныс істері басқармасы барлық әскерге шақырылушыларды өз борышын адал өтеуге шақырады. Әскери қызмет – тәртіп пен жауапкершілікті қалыптастырудың сенімді жолы.