Қала – бұл тек ғимараттар мен көшелер ғана емес, ең алдымен, адамдарға қолайлы өмір сүру кеңістігі. Сондықтан біз үшін қоғамдық орындарды абаттандыру – уақытша науқан емес, тұрақты әрі жүйелі жұмыс.
Биыл орталық алаң, «Универсам», «Дом одежды» дүкендерінің алдындағы алаңдар жаңартылуда.
Орталық алаңдағы ескерткішті көшірілуде. Бұл шешім – көпшілікке қолайлы, қауіпсіз әрі ашық қоғамдық кеңістік қалыптастыру мақсатында қабылданған. Бұрын ескерткіш орналасқан тұтас алаң бұзылды. Себебі қыс мезгілінде бұл аумақ тұрғындар қозғалысына кедергі келтіріп, қауіп төндіретін. Ендігі жерде бұл аумақ автокөліксіз, жаяу жүргіншілерге арналған кең әрі жайлы серуен аймағына айналады. Сонымен қатар, істен шыққан субұрқақ алынып тасталады.
Орталық алаңмен жалғасатын бөліктегі брусчатка не себепті ауыстырылып жатыр деген сауалдар көптеп түсуде. Бұл жұмыс қаланың жаңа дизайн кодына сай жүзеге асырылып жатыр. Бірегей стильде жоспарланған бұл аумаққа арка орнатылып, көгалдандыру жұмыстары жүргізіледі. Сондай-ақ заманауи автоматты суару жүйесі енгізіледі. Кіреберіс бөлігіне алтыбақандар орнату жұмысы аяқталды.
Ал «Дом одежды» дүкені алдында жаңа шағын архитектуралық пішіндер, жаңа орындықтар, жарық шамдары орнатылып, суару жүйесі жаңартылады.
Бұзылмаған брусчаткалар бұрын жаяу жүргінші жолы болмаған көшелерге төселеді. Қалада осындай 13 орын белгіленді.
Біз қаланы әсем әрі ыңғайлы ету жолында нақты қадамдар жасап келеміз. Әрбір бастама — тұрғындар үшін. Сондықтан барлық жобалар ашық түрде жүзеге асып, жүйелі бақылауда болады.