Президент Қасым-Жомарт Тоқаев Қазақстан Республикасы Конституциясының 30 жылдығына арналған «Конституция және мемлекеттілік: құқық пен болашақ диалогы» атты ғылыми-практикалық конференцияда сөз сөйледі. Мемлекет басшысы Конституцияның ел дамуы жолындағы айрықша рөлін атап өтіп, оның әрбір бабы халқымыздың ортақ құндылықтары мен мақсаттарын айқын бейнелейтінін жеткізді.
Президенттің айтуынша, соңғы жылдары Қазақстанда ауқымды саяси өзгерістер жүзеге асырылып, Конституциялық реформа олардың берік құқықтық негізіне айналды. Сол арқылы «Әділетті мемлекет» қағидатын саясатта, экономикада, әлеуметтік салада және сот жүйесінде жүзеге асыруға жол ашылды.
Мемлекет басшысы халық игілігі үшін қабылданған нақты шараларды да атап өтті. Соның ішінде «Ұлттық қор – балаларға» бағдарламасы арқылы жас ұрпақтың болашағына сенім беретін қадам жасалды. Сонымен қатар, адам саудасына қарсы іс-қимыл туралы заң қабылданып, тұрмыстық зорлық-зомбылық үшін жаза күшейтілді, мәжбүрлі некеге және адам ұрлауға қатысты қылмыстық жауапкершілік енгізілді.
Президент қылмыстық сот үдерісін ізгілендіру бағытында да маңызды өзгерістер енгізілгенін айтты. Конституцияның мерейтойына орай қабылданған рақымшылық заңы да мемлекеттің әлеуметтік әділдік пен адамгершілік құндылықтарды басты орынға қоятынын көрсетеді.
Осылайша, Ата заң өзінің әлеуетін толықтай іске асырып, азаматтардың құқықтары мен мүдделерін қорғайтын сенімді әрі тиімді құралға айналды.