Кенді қала — Сәтбаевта Кеншілер мен байытушылар күні кең көлемде аталып өтті. Бұл мереке – елдің индустриялық дамуына, экономикалық әлеуетін нығайтуға өлшеусіз үлес қосып жүрген еңбек майталмандарына көрсетілген айрықша құрмет.
Салтанатты шарада кен өндірісі саласында көп жылдар бойы еңбек етіп, табысқа жеткен бірқатар азаматтарға Мемлекеттік наградалар табыс етілді.
Сондай-ақ, Ұлытау облысының Құрмет грамоталары және «Қазақмыс» корпорациясының арнайы марапаттары берілді. Бұл марапаттар – кеншілердің маңдай тері мен қажырлы еңбегіне деген елдік алғыс пен ризашылықтың айғағы.
Жиналғандар мерекелік сәтте кеншілер мен байытушылардың табандылығы мен кәсібилігі өндірістің жүрегін соқтырып тұрғанын, олардың еңбегінің арқасында қаланың ғана емес, тұтас елдің дамуы қамтамасыз етіліп отырғанын атап көрсетті.
Кеншілер мен байытушылар – қаламыздың мақтанышы, Қазақстанның қуаты мен болашағы!