Сәтбаев қаласындағы №292 –референдум учаскесі Ш.Ділдебаев атындағы Кеншілер Сарайына орналасқан. Мұнда қалалық «Ақ әжелер» ансамблі бар. Ансамблдің бірнеше мүшесі осы учаскеге тіркелген екен. Олар өзара ақылдасып референдумға ерекше салтанатпен баруды ойластырыпты.
-Біз өнер адамы болғандықтан, дауыс беруге барған кезде ұлттық киім киініп және ән шырқап барғанды дұрыс көрдік. – дейді ансамбл мүшесі, қаланың Құрметті азаматы, ардагер ұстаз Ағайша Сәдуақасова.
Референдум учаскесі алдында талантты композитор , марқұм Нұрлан Керімбековтің «Сәтбаев вальсі» әнін шырқап тұрған әжелер көпшілік тарапынан қызығушылық тудырды. Осылайша, референдумға дауыс беру ұлттық киім мен қазақ өнерін дәріптеуге де ұласып жатты.
Абдолла Дастанов
Ұлытау облысы