Қазіргі заманда елдің экономикалық дамуы мен тұрақтылығы білікті жұмысшы кадрлардың сапасына тікелей байланысты. Осыған орай, елімізде «Жұмысшы мамандықтар жылы» деп жарияланған жыл – кәсіби білім беру жүйесін дамытуға, жұмысшы мамандықтарының беделін арттыруға және жастарды еңбекке баулуға бағытталған маңызды бастама болып отыр.
Жұмысшы мамандықтары – өндірістің негізі, экономиканың қозғаушы күші. Электрик, дәнекерлеуші, құрылысшы, механик, токарь, аспаз сынды кәсіп иелері – қоғамға аса қажет мамандар. Бұл мамандықтар тек физикалық еңбекпен ғана емес, терең білім мен дағдыны, жауапкершілікті талап етеді.
Жұмысшы мамандықтар жылының аясында елімізде кәсіптік-техникалық білім беру ұйымдарын жаңғырту, заманауи құрал-жабдықтармен қамтамасыз ету, дуалды оқыту жүйесін енгізу, жас мамандарды қолдау шаралары жүзеге асырылады. Сонымен қатар, жастар арасында жұмысшы кәсіптерін насихаттау, кәсіби шеберлік сайыстары мен форумдар өткізу де маңызды рөл атқарады.
Бұл бастама – еңбек адамына деген құрметтің көрінісі. Жұмысшы мамандықтарын дәріптеу арқылы біз елдің болашағын, өнеркәсіптің өркендеуін қамтамасыз ете аламыз.