Ұлытау облысында “Заң мен тәртіп” қағидатын ілгерілету бойынша семинар-тренинг өтті
Ұлытау облысы қоғамдық даму басқармасы Өңірлік коммуникациялар қызметінің ұйымдастыруымен “Заң мен тәртіп: ашық коммуникация және медиа тәуекелдерді басқару” тақырыбында семинар-тренинг өткізілді. Іс-шара өңірде заң үстемдігін нығайтуға бағытталған ақпараттық саясаттың тиімділігін арттыруды, ашық коммуникацияның рөлін күшейтуді және медиа тәуекелдерді басқару дағдыларын дамытуға арналды.
Семинарды Қазақстан Республикасы Жоғарғы Сотының Коммуникация бөлімінің меңгерушісі, тарих ғылымдарының кандидаты Перизат Сәдуақас жүргізіп, сот жүйесіндегі коммуникация тәжірибесі мен медиа стратегия құру қағидаттары туралы жан-жақты мәлімет берді.
Іс-шарада Үкіметтің 2025 жылғы 1 сәуірдегі №200 қаулысымен бекітілген 2025–2030 жылдарға арналған «Заң мен тәртіп» тұжырымдамасының негізгі бағыттары таныстырылды. Құжат заң үстемдігін нығайту, құқық қолдануды жетілдіру, құқықтық сауаттылықты арттыру және сот төрелігіне қолжетімділікті қамтамасыз етуге бағытталғаны атап өтілді.
Сондай-ақ құқықтық мәдениетті дамытудың негізгі қағидаттары – заңның бәріне бірдей қолданылуы, ашықтық пен есептілік, адам құқықтарын құрметтеу және ұлттық-мәдени ерекшеліктерді ескеру мәселелері түсіндірілді.
Семинар аясында медиа стратегияның міндеттері де айтылды: құқық қорғау органдары жұмысының тиімділігін көрсету, қоғамның сенімін арттыру және алдын алу-ағартушылық жобаларды ақпараттық тұрғыдан кеңінен жариялау.