ҚР Парламенті Мәжілісінің депутаты, «Ұлттық волонтерлік желі» заңды тұлғалар бірлестігінің басшысы Вера Ким волонтерлік қозғалыс пен экологиялық мәдениеттің ел дамуы үшін маңыздылығына тоқталды.
Оның айтуынша, волонтерлердің белсенділігі мен экологиялық мәдениетті конституциялық деңгейде мойындау Қазақстанда тұрақты дамудың берік моделін қалыптастыруға мүмкіндік береді. Бұл қадам азаматтық қоғамды нығайтып қана қоймай, халықтың қоршаған ортаға деген жауапкершілігін арттырады.
Вера Ким волонтерлік қызметтің қоғамдағы әлеуметтік мәселелерді шешуде, жастарды тәрбиелеуде және экологиялық сана қалыптастыруда ерекше рөл атқаратынын атап өтті. Оның пікірінше, волонтерлердің бастамалары экологияны қорғау, табиғатты сақтау және қоғамдық кеңістіктердің тазалығын қамтамасыз ету бағытында нақты нәтижелер беріп келеді.
Сондай-ақ депутат экологиялық мәдениетті дамыту тек мемлекеттік органдардың ғана емес, әрбір азаматтың ортақ міндеті екенін айтты. Конституциялық деңгейде бұл құндылықтарды бекіту халықтың экологияға деген көзқарасын түбегейлі өзгертіп, болашақ ұрпақ үшін қолайлы орта қалыптастыруға ықпал етеді.
Айта кетейік, соңғы жылдары елімізде волонтерлік қозғалыс қарқынды дамып, экологиялық акциялар мен қоғамдық бастамаларға қатысушылар саны артып келеді. Бұл үрдіс қоғамның белсенділігі мен жауапкершілігінің өскенін көрсетеді.
