Жарық – бұл жай ғана шам емес. Бұл – қауіпсіздік, тәртіп және тұрғындардың тыныштығы. Қала көшелері мен аулаларының жарық болуы – кешкі уақыттағы еркін қозғалыс, балалардың алаңсыз ойыны, тұрғындардың өз үйіне сенімді оралуы деген сөз. Сондықтан жарықтандыру мәселесі қаланың инфрақұрылымын дамытудағы басым бағыттардың бірі болып қала береді.
Өткен жылы бұл бағытта ауқымды жұмыстар атқарылды. Қала көшелерінде, тұрғын үйлер аулаларында және білім беру ұйымдарының маңында жаңа жарық шамдары орнатылды. Нәтижесінде 100 ватттық 550 дана жарық шамы, 100 ватттық 50 дана прожектор және қосымша 2 530 дана жарық шамы іске қосылды. Бұл шаралар қаланың түнгі көрінісін жақсартып қана қоймай, қауіпсіздік деңгейін арттыруға нақты үлес қосты.
Жүргізілген жұмыстардың тиімділігін бағалау мақсатында өткен жылы орнатылған жарық шамдары мен бағаналардың жағдайы зерделенді. Тексеру нәтижелері негізінде биылғы жұмыстардың нақты жоспары айқындалды. Бұл – жүйелі әрі жауапты көзқарастың көрінісі.
Биыл жарықтандыру ісі кезең-кезеңімен жалғасады. Қала аумағында 1 800 дана жарық шамын орнату, 1 200 метр электр кабелін тарту, 100 ватттық 400 дана жарық шамы мен 50 дана прожектор орнату жоспарланып отыр. Әсіресе мектептердің маңына басымдық беріліп, қаланың төменгі бөлігі қамтылады. Бұл – балалардың қауіпсіздігін қамтамасыз етуге және тұрғындар үшін қолайлы орта қалыптастыруға бағытталған маңызды қадам.
Қаланың әрбір аумағы назардан тыс қалмайды. Жарықтандыру – тек инфрақұрылымдық жоба емес, бұл – өмір сапасын арттыруға арналған жүйелі жұмыс. Алдағы уақытта да бұл бағыттағы шаралар жалғасын тауып, қаламыздың әр көшесі жарық әрі қауіпсіз болуына күш салынады.
Жарық бар жерде – сенім бар. Ал сенім бар жерде – тұрақты даму мен жайлы өмір бар.
