Қазақстанның Азаматтық альянсы «ҰСТАНЫМ» Ұлттық пікірталас клубы аясында «Конституция: Қазақстанның тарихи таңдауының айнасы» тақырыбында отырыс өткізді. Іс-шара елімізде жүзеге асырылып жатқан конституциялық реформаларға арналды және азаматтық қоғамның бұл үдерістердегі рөлін талқылауға бағытталды.
Жиынға сарапшылар қауымдастығының өкілдері, үкіметтік емес ұйымдардың жетекшілері, Қазақстанның 20 өңіріндегі азаматтық альянстардың көшбасшылары, сондай-ақ Қоғамдық кеңестердің төрағалары мен мүшелері қатысты. Кең өңірлік және кәсіби өкілдік пікір алмасудың мазмұнын байытып, конституциялық өзгерістерге жан-жақты баға беруге мүмкіндік берді.
Кездесу барысында азаматтық қоғам институттарының конституциялық реформаны іске асыруға қатысуы, мемлекеттік органдармен өзара іс-қимыл тетіктерін жетілдіру, сондай-ақ реформаларды әзірлеу мен талқылау үдерісіне қоғамның кеңінен қатысуын қамтамасыз ету мәселелері көтерілді. Қатысушылар реформалардың табысты жүзеге асуы ашық диалог пен қоғамдық қолдауға тікелей байланысты екенін атап өтті.
Отырыс қорытындысы бойынша Қазақстанның Азаматтық альянсы конституциялық реформаны қолдау жөнінде ресми мәлімдеме жасады. Мәлімдемеде аталған реформалардың елдің саяси жүйесін одан әрі дамытудағы, мемлекеттік басқарудың тиімділігін арттырудағы және азаматтардың құқықтары мен бостандықтарын нығайтудағы маңызы ерекше екені айтылды.
Сонымен қатар, Қазақстанның Азаматтық альянсы Конституциялық комиссия мүшелеріне атқарған жүйелі жұмысы және азаматтық қоғам тарапынан ұсынылған пікірлер мен бастамаларға ашықтық танытқаны үшін алғыс білдірді. Альянс өкілдері алдағы уақытта да азаматтық қоғам реформаларды іске асыруға белсенді түрде қатыса беретінін атап өтті.
