Қазанның 19-ы – елімізде азаматтардың қауіпсіздігін қамтамасыз етуде аянбай еңбек етіп жүрген төтенше жағдайлар қызметі мамандарының кәсіби мерекесі – Құтқарушылар күні аталып өтеді. Бұл күн – батырлық пен ерліктің, қайсарлық пен жанқиярлықтың мерекесі.
Құтқарушылардың еңбегі – ерекше құрметке лайық. Себебі олар әр сәтте адамдардың өмірі мен денсаулығын қорғап, табиғи және техногендік апаттар кезінде қауіптің дәл ортасында қызмет етеді. Су тасқыны, өрт, жол-көлік оқиғалары немесе басқа да төтенше жағдайлар кезінде бірінші болып көмекке ұмтылатын да – осы ержүрек жандар.
Құтқарушылар – қоғамдағы ең жауапты және ауыр қызмет иелері. Олар үшін әрбір шақыру – сынақ, әрбір құтқарылған адам – ең үлкен марапат. Күн сайын өз өмірін қатерге тігіп, өзгелердің өмірін сақтап қалуға бар күш-жігерін салады. Мұндай еңбек жоғары рух пен адалдықты, кәсіби шеберлікті талап етеді.
Осы мереке күні еліміздің барлық төтенше жағдайлар қызметінің мамандарына, ардагерлеріне және осы салада еңбек етіп жүрген барша азаматтарға алғыс білдіреміз. Сіздердің батылдықтарыңыз бен табандылықтарыңыз – еліміздің тыныштығы мен азаматтардың қауіпсіздігінің кепілі.
Құрметті құтқарушылар! Сіздерді кәсіби мерекелеріңізбен шын жүректен құттықтаймыз!
Отбасыларыңызға амандық, еңбектеріңізге табыс, дендеріңізге саулық тілейміз!
Еліне адал қызмет етіп жүрген Сіздерге ризашылық білдіреміз!