Қазақстан Президентінің АҚШ-қа ресми сапары басталды
Қазақстан Президенті Қасым-Жомарт Тоқаев АҚШ астанасы – Вашингтон қаласына ресми сапармен келді. Мемлекет басшысын әуежайда АҚШ Мемлекеттік хатшысының бірінші орынбасары Кристофер Ландау қарсы алды.
Сапардың негізгі мақсаттары – екіжақты стратегиялық ынтымақтастықты нығайту, саяси және экономикалық серіктестікті одан әрі кеңейту.
Ертең Қасым-Жомарт Тоқаев АҚШ Президенті Дональд Трамппен келіссөздер жүргізеді. Кездесу барысында сауда-экономикалық байланыстар, инвестициялық жобалар, өңірлік және халықаралық қауіпсіздік мәселелері талқыланады деп күтілуде.
Сонымен қатар Мемлекет басшысы «Орталық Азия – АҚШ» саммитіне қатысып, аймақтық ынтымақтастық жөніндегі маңызды мәселелерді сөз етпек.
Бұл сапар Қазақстан мен Америка Құрама Штаттарының арасындағы стратегиялық серіктестіктің жаңа кезеңіне жол ашуы ықтимал.