Қасым-Жомарт Тоқаев ауыл шаруашылығы қызметкерлеріне олардың қиын еңбегі үшін алғыс білдірді
«Ең алдымен барлық ауыл шаруашылығы қызметкерлерін кәсіби мерекелерімен құттықтағым келеді. Бұл – нағыз еңбек адамдары құрметтелетін күн. Фермерлер, мал шаруашылығы мамандары, диқаншылар еліміздің дамуы мен өркендеуіне зор үлес қосып келеді. Сіздерге қиын да жауапты еңбектеріңіз үшін шын жүректен алғыс айтамын.
Ауыл шаруашылығы – стратегиялық маңызы бар, экономиканың аса маңызды саласы.
Бүгін біз еліміздің өңірлерінен келген білікті мамандардың қатысуымен аграрлық сектор мәселелеріне арналған екінші Форумды өткізіп отырмыз. Сондықтан бұл іс-шараны ұлттық деңгейдегі маңызды оқиға деп толық айтуға болады. Сөз сөйлеген қатысушылар маңызды әрі жан-жақты ұсыныстарын жеткізді. Бұл ұсыныстарды мұқият зерттеп, алдағы жұмыста міндетті түрде ескеру қажет».