Ұлытау облысының «Қоғамдық келісім» коммуналдық мемлекеттік мекемесінде ұйымдастырылған Ашық есік күні тұрғындар үшін маңызды әлеуметтік алаңға айналды. Шараның негізгі мақсаты – қоғамдағы жанжалдарды алдын алу, азаматтарға құқықтық әрі психологиялық қолдау көрсету және медиация мәдениетін кеңінен насихаттау.
Іс-шара барысында Медиация орталығының тәжірибелі мамандары келушілерге тегін кеңес беріп, түрлі өмірлік жағдайларда туындаған дауларды шешудің тиімді жолдарын ұсынады. Атап айтқанда, азаматтарға жанжалдың себеп-салдарын анықтау, эмоцияларды басқару, сондай-ақ қарсы тараппен сындарлы диалог орнату мәселелері бойынша нақты ұсыныстар беріледі.
Медиаторлар әрбір жағдайды жеке қарастырып, тараптардың мүддесін ескере отырып, ортақ келісімге келудің маңыздылығын түсіндіреді. Бұл өз кезегінде сотқа жүгінбей-ақ, уақыт пен қаржыны үнемдеуге мүмкіндік береді.
Ашық есік күніне келген әрбір азамат өзінің мәселесін ашық айтып, құпиялылық сақталған жағдайда кәсіби көмек ала алады. Мұндай бастамалар қоғамдағы тұрақтылықты сақтауға, өзара сыйластық пен сенімді нығайтуға септігін тигізеді.
Ұйымдастырушылар алдағы уақытта да осындай игі шараларды тұрақты түрде өткізуді жоспарлап отыр.
