Бүгін Мемлекет басшысы Қасым-Жомарт Тоқаев Қызылорда облысына жұмыс сапары аясында халықаралық «Қорқыт ата» әуежайының жаңа терминалын аралап көрді. Президент өңірдің көлік инфрақұрылымын дамыту бағытында атқарылып жатқан жұмыстармен және әуе айлағының қызметімен жан-жақты танысты.
Сапар барысында Мемлекет басшысына әуежайдың ішкі және халықаралық бағыттағы жолаушыларға қызмет көрсету үдерісі таныстырылды. Президент тіркеу және тексеру аймақтарын, шекара және кеден бақылау пункттерін, күту залдарын және автоматтандырылған багаж беру жүйесін аралап көрді.
Қызылорданың жаңа әуе терминалы — өңірдің заманауи келбетін айқындайтын ірі нысандардың бірі. Нысан өткен жылдың қараша айында пайдалануға берілген. Бұл жобаның жалпы құны 16,6 миллиард теңгені құрайды, оның барлығы дерлік жеке инвестициялар есебінен қаржыландырылған.
Сонымен қатар, инженерлік-коммуникациялық инфрақұрылымды жүргізу үшін жергілікті бюджеттен 4,3 миллиард теңге бөлінді. Бұл қаржы әуежайдың тиімді жұмыс істеуіне, жолаушыларға қолайлы жағдай жасауға және өңірдің көлік жүйесін жаңа деңгейге көтеруге бағытталған.
Қызылорда қаласындағы халықаралық әуежай — аймақтың экономикалық және туристік әлеуетін арттыратын маңызды нысан. Жаңа терминалдың іске қосылуы ішкі және сыртқы әуе қатынастарын кеңейтіп, өңірдің инвестициялық тартымдылығын күшейтеді.
Мемлекет басшысы атап өткендей, мұндай инфрақұрылымдық жобалар еліміздің өңірлерін дамытуда шешуші рөл атқарады. Олар жаңа жұмыс орындарын ашып қана қоймай, халықтың өмір сүру сапасын жақсартуға және елдің көлік қауіпсіздігін қамтамасыз етуге мүмкіндік береді.
Осылайша, Қызылордадағы «Қорқыт ата» халықаралық әуежайының жаңа терминалы – елдің инфрақұрылымдық әлеуетін арттыруға, өңірлік экономиканы дамытуға бағытталған маңызды стратегиялық жоба болып табылады.