«Мәңгілік Ел» ұғымының тамыры тереңде жатыр. Бұл идеяның бастауы түркі дәуірінен, Ұлы Дала өркениетінен бастау алады. Ежелгі түркі жазбаларында «Мәңгі ел орнату», «Мәңгі тасқа жазылған мұра қалдыру» деген ұғымдар жиі кездеседі. Орхон-Енисей ескерткіштерінде Білге қаған мен Күлтегін елдің бірлігін сақтап, мемлекетті нығайту – халықтың мәңгілігінің кепілі екенін айтқан. Бұл – бүгінгі тәуелсіз Қазақстанның да басты ұстанымы.
XXI ғасыр – жаһандану дәуірі. Ақпараттық технологияның, инновацияның дамуы, әлемдік саясаттағы өзгерістер әрбір мемлекеттің ішкі тұрақтылығына әсер етеді. Осындай жағдайда ұлттық бірегейлікті сақтау, тіл мен мәдениетті дамыту, рухани тұтастықты нығайту – кез келген ел үшін басты міндет. Қазақстан осы бағытта өзіндік жолын айқындады.
«Мәңгілік Ел» идеясы – осы сын-қатерлерге жауап бола алатын, ұлттық иммунитетті қалыптастыратын идеология. Ол ұлттың рухын көтеріп, жас ұрпақты отансүйгіштікке, елжандылыққа тәрбиелеуге бағытталған.
Бүгінгі таңда еліміз «Жаңа Қазақстан» тұжырымдамасы аясында саяси және экономикалық реформаларды жүзеге асыруда. Бұл өзгерістердің барлығының түпкі мақсаты – әділетті қоғам құру, азаматтардың әл-ауқатын арттыру. Ал әділетті қоғамның негізінде де – Мәңгілік Ел мұраты жатыр.
Мәңгілік Ел – тек саяси ұғым ғана емес, ол – рухани категория. Ол адамның бойындағы ең асыл қасиеттерді: мейірімділік, әділдік, еңбекқорлық, өзара құрмет пен жауапкершілікті дәріптейді.
Қазақ халқының дәстүрлі дүниетанымында «ел болу», «жер қадірі», «бірлік» ұғымдары ерекше мәнге ие. Осы құндылықтар Мәңгілік Елдің рухани өзегін құрайды. Ұлт ұстазы Ахмет Байтұрсынұлы: «Басқадан кем болмас үшін біз білімді, өнерлі, күшті болуымыз керек» деген. Бұл – Мәңгілік Елге ұмтылған халықтың басты ұраны іспетті.
Сонымен қатар, Ел Президенті Қасым-Жомарт Тоқаев ұсынған «Әділетті Қазақстан» идеясы да Мәңгілік Ел мұратымен үндеседі. Себебі, әділетті қоғам орнамай, елдің мәңгілігі мен тұрақтылығы да баянды болмайды.
Мәңгілік Ел идеясын жүзеге асырушы негізгі күш – жастар. Өскелең ұрпақ елдің болашағы, мемлекет тірегі. Сол себепті жастардың бойына отансүйгіштік рухты, жауапкершілік пен еңбекқорлық қасиеттерін сіңіру – заман талабы.
Қазіргі жастар білімді, жаңа технологияларды меңгерген, әлемдік кеңістікке ашық болуы тиіс. Бірақ сонымен қатар, өз халқының тарихын, тілін, дәстүрін ұмытпау – Мәңгілік Елдің басты талабы. Елдің болашағы өз тамырынан ажырамаған, рухы мықты, мәдениеті терең жастардың қолында.
Білім беру жүйесінде, қоғамдық ұйымдар мен жастар қозғалыстарында осы идеяны насихаттау – ел болашағына салынған инвестиция.
«Мәңгілік Ел» идеясын жүзеге асыру – ұзақ мерзімді процесс. Ол тек бір кезеңнің емес, бірнеше ұрпақтың еңбегін қажет етеді. Бұл жолда мемлекет пен қоғам, әр азамат өз үлесін қосуы тиіс.
Болашақта Қазақстан дамыған, әділетті, өркениетті елге айналуы үшін ұлттық мүдде мен мемлекеттік мақсат бір арнаға тоғысуы қажет. Мәңгілік Елдің іргетасы – әділдік, ынтымақ, білім мен еңбектің қадірін білу.
Мәңгілік Ел болу деген – тек экономикалық тұрғыдан мықты мемлекет болу емес, ол рухы биік, мәдениеті бай, азаматтары бір мақсатқа ұмтылған ел болу деген сөз.
Қорытындылай келгенде, Мәңгілік Ел – қазақ халқының ғасырлар бойғы арманының жүзеге асқан бейнесі. Ол – тәуелсіздіктің, ел бірлігінің, ұлт рухының символы. Бұл идея елдің дамуының темірқазығы болып табылады. Әрбір азамат осы мұратты жүрегінде сақтап, өз ісімен оның жүзеге асуына үлес қосуы қажет.
«Мәңгілік Ел» – өткен мен болашақты жалғаған алтын көпір. Ол – тәуелсіздіктің мәңгілігіне, ел бірлігінің беріктігіне, рухани тұтастықтың мызғымастығына бастайтын жол. Осы жолмен жүріп, біз ұрпаққа – Тәуелсіз, әділетті, гүлденген Қазақстанды мұра етіп қалдыруымыз керек.
Сәтбаев қаласының ішкі саясат бөлімінің әдіскері
Ұ.Төкенова