Қазақстанда «Таза Қазақстан» республикалық экологиялық акциясы аясында @TazaQazBot Telegram чат-боты өз жұмысын жалғастырып, тұрғындармен кері байланыстың тиімді цифрлық құралына айналды.
Аталған сервис 2024 жылдың маусым айында іске қосылған болатын. Бүгінде ол экология және абаттандыру саласындағы мәселелерді жедел жеткізуге мүмкіндік беретін қолайлы платформа ретінде кеңінен қолданылуда.
Чат-бот арқылы өтінім жолдау үшін пайдаланушы Telegram қосымшасында ботқа кіріп, авторизациядан өтеді. Одан кейін мәселенің фотосын тіркеп, нақты мекенжайын көрсетіп, қысқаша сипаттама қалдыру жеткілікті. Жіберілген өтінімдер автоматты түрде тиісті мемлекеттік органдарға бағытталады, бұл қосымша қоңыраулар мен өтініштерді қажет етпейді.
Платформаның басты ерекшеліктерінің бірі — ашықтық пен қолжетімділік. Пайдаланушылар әр өтінімнің қаралу және орындалу барысын онлайн түрде бақылай алады. Жұмыс аяқталғаннан кейін фотоесеп ұсынылып, көрсетілген қызмет сапасын бағалау мүмкіндігі беріледі.
Өтінімдер 21 санат бойынша жіктеледі. Олардың қатарында аумақтарды тазалау, қоқыс шығару, жолдарды жөндеу, жарықтандыру, көгалдандыру және су айдындарын тазарту сынды бағыттар бар. Бұл жүйе өтінімдерді тиімді өңдеуге және жауапты мекемелердің жұмысын нақты үйлестіруге мүмкіндік береді.
Ресми деректерге сәйкес, 2025 жылдың қорытындысы бойынша чат-бот арқылы 26 мыңнан астам өтінім келіп түсіп, оның 24 мыңнан астамы орындалған. Ең көп тіркелген өтінімдер аумақтарды тазалау жұмыстарына қатысты.
Ал 2026 жылдың бірінші тоқсанында 4 мыңнан астам өтінім қабылданып, олардың басым бөлігі орындалды.
@TazaQazBot цифрлық сервистердің тұрғындар мен мемлекет арасындағы өзара байланысты нығайтудағы, мәселелерді жедел шешудегі және жергілікті атқарушы органдар жұмысының тиімділігін арттырудағы маңызды құрал екенін көрсетіп отыр.
@TazaQazBot — жайлы әрі таза орта қалыптастыруға арналған сенімді цифрлық сервис.
