Қазіргі таңда қоғамда кең таралып келе жатқан психологиялық тәуелділіктердің бірі – лудомания, яғни құмар ойындарға тәуелділік. Бұл дерт адамды біртіндеп өзіне бағындырып, оның психикалық жағдайына, әлеуметтік өміріне, отбасылық қарым-қатынасына және қаржылық ахуалына елеулі зиян келтіреді. Лудомания көбіне байқалмай басталып, уақыт өте келе ауыр салдарға әкелетін қауіпті тәуелділік түрі болып саналады.
Лудоманияға шалдыққан адам құмар ойындарға шамадан тыс әуестеніп, оларды өмірінің басты мәніне айналдырады. Мұндай тәуелділік адамның мінез-құлқын өзгертіп, жауапкершілігін төмендетіп, күйзеліске, ашуланшақтыққа, оқшаулануға алып келеді. Көп жағдайда бұл мәселе тек ойыншының өзіне ғана емес, оның жақындарына да кері әсерін тигізеді.
Осы өзекті тақырыпты жан-жақты талқылау мақсатында психолог Налобина Татьяна Васильевнамен тікелей эфир ұйымдастырылады. Эфир барысында лудоманияның пайда болу себептері, оның алғашқы белгілері, психологиялық және әлеуметтік салдары кеңінен түсіндіріліп, тәуелділіктің алдын алу жолдарына ерекше назар аударылады.
Сонымен қатар тікелей эфирде құмар ойындарға тәуелді болмау үшін қандай дағдыларды қалыптастыру қажет екені, қиын жағдайға тап болған кезде қайда және кімге жүгінуге болатыны туралы пайдалы кеңестер беріледі. Көрермендер маманға өздерін мазалаған сұрақтарын қойып, нақты әрі кәсіби жауаптар алу мүмкіндігіне ие болады.
Психологтың айтуынша, лудоманияның алдын алуда ең бастысы – уақытылы түсініп, мәселені мойындау және психологиялық қолдауға жүгіну. Ашық әңгіме мен дұрыс ақпарат көптеген адамдарға тәуелділіктен сақтануға немесе одан арылуға көмектесе алады.
Тікелей эфир 2026 жылғы 3 ақпанда, сағат 15:00-де өтеді. Эфирді Instagram әлеуметтік желісіндегі @qogamdyq_kelisim_ulytau парақшасынан көруге болады.
Қоғам үшін маңызды әрі өзекті тақырыпты назардан тыс қалдырмай, тікелей эфирге қосылып, білікті маманның пайдалы кеңестері мен нақты жауаптарын алыңыз.
