Мемлекеттік кеңесші Ерлан Қарин биылғы Ұлттық құрылтай жұмысы аясында маңызды нәтижелерге қол жеткізілгенін атап өтті. Оның айтуынша, кеше құрылтайдың төрт секциясы өз отырыстарын өткізіп, қоғамның түрлі салаларын қамтыған өзекті мәселелер кеңінен талқыланды.
Аталған секциялық отырыстар барысында құрылтайдың 70-ке жуық мүшесі сөз сөйлеп, 200-ден астам нақты ұсыныс пен бастама ортаға салынған. Бұл ұсыныстар елдің әлеуметтік-экономикалық дамуы, өңірлердің әлеуетін арттыру, мәдениет, білім, тәрбие, қоғамдық келісім мен ұлттық құндылықтарды нығайту сияқты бағыттарды қамтыды.
Ерлан Қариннің айтуынша, Ұлттық құрылтай – қоғамдағы өзекті мәселелерді ашық талқылап, оларды жүйелі түрде шешуге мүмкіндік беретін тиімді диалог алаңы. Секциялар жұмысы барысында айтылған пікірлер мен ұсыныстар алдағы уақытта мемлекеттік саясатты жетілдіруде ескерілетін болады.
Мемлекеттік кеңесші өз сөзінде былтыр Бурабайда өткен Ұлттық құрылтайдың өңірлерді дамытуға айтарлықтай серпін бергенін ерекше атап өтті. Оның нәтижесінде аймақтардың әлеуметтік-экономикалық дамуына бағытталған бірқатар маңызды бастамалар іске асқан.
– Былтыр өңірлердің дамуы бойынша нақты қадамдар жасалды. Қазақстан Республикасының Өңірлік даму тұжырымдамасы қабылданды. Бұл құжаттың басты міндеті – халықты негізгі инфрақұрылымдармен, соның ішінде жол, су, электр, әлеуметтік және мәдени нысандармен тең дәрежеде қамтамасыз ету. Сонымен қатар, өңірлердегі негізгі мәдени-туристік іс-шаралардың бірыңғай тізбесі жасалды, – деді Ерлан Қарин.
Оның айтуынша, бұл бастамалар – бір жыл ішінде атқарылған жұмыстардың тек бір бөлігі ғана. Бурабайдағы құрылтайда айтылған ұсыныстар негізінде жүйелі жұмыстар жүргізіліп, олар нақты жобалар мен бағдарламаларға ұласқан.
Сондай-ақ Мемлекеттік кеңесші бастамалардың тиімді іске асуы үшін құрылтай мүшелерінің белсенділігі маңызды екенін атап өтті. Осы мақсатта құрылтай мүшелері секциялық отырыстарда ғана емес, жұмыс кездесулерінде, түрлі талқылаулар мен сараптамалық жиындарда ұсыныстарды жан-жақты пысықтап отырған.
– Құрылтайда көтерілген бастамалар қағаз жүзінде қалып қоймай, нақты іске асуы тиіс. Бұл бағытта құрылтай мүшелері тұрақты түрде жұмыс істеп, өз ұсыныстарын пысықтап, мемлекеттік органдармен бірлесіп талқылау жүргізді, – деді ол.
Жалпы, биылғы Ұлттық құрылтайдың жұмысы қоғамның әртүрлі өкілдерін біріктіріп, ел дамуына қатысты маңызды шешімдер қабылдауға бағытталғанын көрсетті. Айтылған ұсыныстар алдағы уақытта мемлекеттік бағдарламалар мен стратегиялық құжаттарды жетілдіруге негіз болмақ.
