Қазақстан Республикасының Бас прокурорының бірінші орынбасары Жандос Өмірәлиев Конституциялық комиссияның отырысында Конституция нормаларының түсініктілігі мен айқындығының маңыздылығына тоқталды. Оның пікірінше, Конституция азаматтар үшін ғана емес, құқық қорғау органдары мен мемлекеттік құрылымдар үшін де қолданыста жеңіл түсінілетін құжат болуы тиіс.
«Конституцияның әрбір нормасы анық және түсінікті болуы қажет. Заңдардың қарапайым және түсінікті болуы – азаматтардың құқықтарын қорғаудың негізгі кепілі және құқықтық мемлекеттің дамуына жағдай жасайды», – деді Жандос Өмірәлиев.
Оның айтуынша, Конституцияның түсінікті нормалары азаматтарға өз құқықтары мен міндеттерін дұрыс түсінуге мүмкіндік беріп, сот жүйесінің ашықтығын арттырады. Сонымен қатар, бұл мемлекеттік органдардың заңнаманы дұрыс қолдануына, құқықтық шешімдердің әділ қабылдануына септігін тигізеді.
Жандос Өмірәлиев Конституциялық реформалар аясында жаңа нормалардың қарапайым әрі нақты етіп жасалуы елдің құқықтық мәдениетін көтеруге, азаматтардың мемлекетке сенімін нығайтуға бағытталғанын атап өтті. Ол құқық қорғау органдары мен мемлекеттік қызметшілер бұл нормаларды іске асыруда жоғары жауапкершілік көрсетуі маңызды екенін айтты.
Қорытындылай келе, Бас прокурордың бірінші орынбасары Конституцияның айқын әрі түсінікті нормалары елдің құқықтық жүйесін тұрақты етуге, азаматтардың құқықтарын қорғауға және құқықтық мемлекет қағидатын бекітуге тікелей ықпал ететінін жеткізді.
