Алматыға жұмыс сапары аясында Қазақстан Президенті Қасым-Жомарт Тоқаев Қазақ ұлттық университеті ғылыми әлеуетімен танысты.
Университет ректоры Жансеит Түймебаев Президентке Farabi Hub инновациялық өнімдер және жоғары технологиялық жобалар орталығын таныстырды. Бұл хаб – инновациялық жобаларды нақты экономикалық секторға енгізуге арналған заманауи платформа. Орталықта креативті индустриялар, жасанды интеллект және стартаптар саласында жобалар жүзеге асырылуда. Нәтижесінде 300 жаңа жұмыс орны ашылып, 20 млн доллардан астам инвестиция тартылған.
Орталықта ZTE, BASF, Binlin сияқты технологиялық корпорациялардың зерттеу алаңдары және шетелдік жетекші ғылыми ұйымдардың филиалдары жұмыс істейді. Сонымен қатар, университеттің ғылыми-зерттеу институттары да осы хабта қызмет көрсетуде.
Президентке университеттің жалпы құны 1 млрд 250 млн теңге болатын төрт ірі жобаны жүзеге асырып жатқаны хабарланды. Сондай-ақ, оған Қытайдың Солтүстік-Батыс политехникалық университетімен бірлесіп әзірленген микроспутниктің макеті көрсетілді.
Екі университеттің ғалымдары NKSAT спутнигін құру үстінде, ол Жердің гравитациялық өрісін өлшеу, радиациялық деңгейді бақылау және геологиялық барлау жұмыстарын жүргізуге арналған. Сонымен қатар, Қасым-Жомарт Тоқаев Қытай ғылым академиясымен бірлесіп құрылған «Қашықтықтан зондтау технологиялары және олардың қолданылуы» зертханасының жұмысымен танысты. Зерттеулерде спутниктік деректер арқылы Орталық Азияның климаттық және экологиялық өзгерістері қарастырылады.
Президентке Халықаралық «Цифрлық технологиялар мен робототехника» институты мен робототехника орталығы жобалары, сондай-ақ Қазақстан-Сингапур Кванттық технологиялар орталығы таныстырылды.
Кездесу суперкомпьютерлік кластерді қараумен аяқталды. Оны құруға 23 млн доллар инвестиция тартылған. Кластер күрделі есептеулерді орындау уақытын қысқартып, ғылыми зерттеулердің тиімділігін арттырып, IT және жасанды интеллект саласындағы мамандарды даярлауға кең мүмкіндіктер ашады.
Бұл сапар университеттің ғылыми әлеуетін көрсету мен Қазақстанның инновациялық даму стратегиясын іске асырудағы маңызды қадам болды.
