Қаланың көркі мен тұрғындардың өмір сүру сапасы – ең алдымен тазалық пен қоғамдық тәртіпке байланысты. Осы бағытта құқық қорғау органдары заманауи технологияларды пайдалана отырып, тәулік бойы бақылау жүргізуде. Полицияның жедел басқару орталығы арқылы орнатылған бейнебақылау камералары қала аумағындағы құқық бұзушылықтарды дер кезінде анықтауға мүмкіндік беріп отыр.
Алайда жүргізілген мониторинг барысында кейбір тұрғындардың ірі көлемді тұрмыстық қалдықтарды белгіленбеген орындарға қалдырып, ортақ ережелерді сақтамай отырғаны белгілі болды. Мұндай әрекеттер қала келбетіне кері әсер етіп қана қоймай, санитарлық жағдайдың нашарлауына алып келеді.
Габаритті қалдықтарға ескі жиһаз, тұрмыстық техника, құрылыс қалдықтары және басқа да көлемді заттар жатады. Аталған қалдықтарды қарапайым қоқыс контейнерлеріне немесе олардың жанына қалдыруға болмайды. Олар арнайы ұйымдастырылған тәртіппен және тиісті қызметтер арқылы шығарылуы тиіс.
Қазақстан Республикасының заңнамасына сәйкес, белгіленген талаптарды бұзған азаматтар әкімшілік жауапкершілікке тартылады. Сондықтан әрбір тұрғын заң талаптарын сақтап, қоршаған ортаға жанашырлықпен қарауы қажет.
Тазалық – тек коммуналдық қызметтердің жұмысы емес, бұл – баршаға ортақ мәдениет пен жауапкершілік. Әр адам өз ауласын, көшесін таза ұстаса, қаламыз көркейіп, өмір сүруге қолайлы орта қалыптасады.
Қала тұрғындарын қоғамдық тәртіпті сақтауға, тазалыққа бейжай қарамауға және ортақ ережелерді құрметтеуге шақырамыз.
#ЗАҢМЕНТӘРТІП
#ЗАКОНИПОРЯДОК
