Биыл Астана қаласында Наурыз мейрамы жаңа мазмұнда ұйымдастырылып, ұлттық дәстүрлер мен цифрлық технологиялардың үйлесімі арқылы ерекшеленді. Елорда мерекені өткізуде заманауи тәсілдерді кеңінен енгізіп, жасанды интеллект элементтерін қолдану арқылы жаңа бағыт қалыптастырды.
Мерекелік кезеңде қала аумағында 200-ден астам іс-шара ұйымдастырылып, оған 400 мыңнан астам адам тікелей қатысты. Сонымен қатар, онлайн трансляциялар арқылы 1,5 миллионнан астам көрермен қамтылды. Бұл көрсеткіштер мерекенің ауқымы мен халық арасындағы жоғары қызығушылықты көрсетеді.
Қала тұрғындары мен қонақтарына 70-ке жуық инновациялық цифрлық шешім ұсынылып, 60 тақырыптық киіз үй ұлттық мәдениетті жаңа форматта таныстырды. Мыңдаған LED-экрандар мен безендіру элементтері мерекелік атмосфераны күшейтіп, қалаға ерекше сән берді.
Мәдени бағдарламаға 300-ге жуық өнер қайраткері қатысып, олардың қатарында Роза Рымбаева және Уркер тобы бар. Бұл өнерпаздар дәстүр мен заманауи өнерді ұштастырып, көрерменге әсерлі қойылымдар ұсынды.
