Алматы қаласындағы «Нұр-Мүбарак» Египет ислам мәдениеті университетінде Ұлытау облысының дін істері басқармасының ұйымдастыруымен студенттермен ресми кездесу өткізілді. Іс-шараға оқу орнында білім алып жатқан Ұлытау өңірінің жастары, соның ішінде 2026 жылғы бітіруші түлектер қатысты.
Кездесу барысында өңірдің дін саласын білікті мамандармен қамтамасыз ету мәселесі жан-жақты талқыланды. Облыс әкімдігі тарапынан аталған бағыттағы жұмыстардың жүйелі түрде жүзеге асырылып жатқаны және бұл мәселенің өңірлік саясаттағы маңызды басымдықтардың бірі екені атап өтілді.
Қазіргі уақытта облыс әкімдігінің қолдауымен 2024 жылы бөлінген білім беру гранттары аясында 4 студент исламтану және дінтану мамандықтары бойынша білім алуда. Сонымен қатар, бүгінгі күні аталған университетте Ұлытау облысынан 21 студент жоғары білім алып жатыр. Оның ішінде 6 студент 2026 жылы оқуын аяқтайды.
Кездесуге Ұлытау облысының бас имамы Бейбіт Жансарин қатысып, студенттерге өңірдегі жұмысқа орналасу мүмкіндіктері, қызметтік талаптар мен әлеуметтік қолдау шаралары туралы кеңінен ақпарат берді. Сондай-ақ, бітіруші түлектерді туған өңірге оралып, кәсіби қызмет атқаруға шақырды.
Іс-шара барысында қатысушылар өзара пікір алмасып, студенттердің сұрақтарына нақты жауаптар ұсынылды. Кездесу ресми әрі іскерлік форматта ұйымдастырылды.
Аталған іс-шара өңірдегі дін саласының кадрлық әлеуетін арттыруға және жас мамандарды тартуға бағытталған маңызды қадамдардың бірі болып табылады.
