ЖҰМЫСШЫ МАМАНДЫҚТАР ЖЫЛЫ: ТӘРБИЕШІ МАМАНДЫҒЫНЫҢ ҚҰНДЫЛЫҒЫ
2025 жыл – жұмысшы мамандықтарының беделін арттыруға бағытталған маңызды кезең. Осы бағыттағы сан түрлі кәсіптердің ішінде қоғам үшін айрықша маңызға ие мамандықтардың бірі – тәрбиеші. Себебі тәрбиеші – баланың алғашқы ұстазы, тұлға болып қалыптасуының бастауы.
Тәрбиеші еңбегі – мейірім мен жауапкершілікті, шыдамдылық пен кәсібилікті талап ететін ерекше қызмет. Ол балалардың күнделікті тәртібін ұйымдастырып қана қоймай, олардың ой-өрісін қалыптастырып, адамгершілік құндылықтарды бойына сіңіреді. Әрбір балаға жеке көзқараспен қарап, олардың қабілетін ашу – тәрбиешінің шынайы шеберлігін көрсетеді.
Жұмысшы мамандықтар жылы тәрбиешілердің қоғамдағы рөлін жаңаша бағалауға мүмкіндік беріп отыр. Өйткені сапалы білім мен жақсы тәрбие – елдің болашағын айқындайтын басты фактор. Мектепке дейінгі білім беру жүйесінде еңбек етіп жүрген ұстаздарымыздың кәсіби шеберлігі мен еңбегі – келешек ұрпақтың жарқын дамуына қосылған үлес.
Тәрбиешілердің еңбегін құрметтеу, олардың жағдайын жақсарту, біліктілігін арттыруға мүмкіндік жасау – қоғамның ортақ міндеті. Себебі тәрбиешіге жасалған қолдау – болашаққа жасалған қолдау.