Қазақстан мен Өзбекстан Президенттерінің келіссөзі: стратегиялық серіктестікті нығайтудың жаңа кезең
Қазақстан Президенті Қасым-Жомарт Тоқаев Ташкентке жасаған мемлекеттік сапары аясында Өзбекстан Президенті Шавкат Мирзиёевпен кеңейтілген мазмұндағы келіссөздер өткізді. Мемлекет басшысы өзбек тарапына дәстүрлі қонақжайлық пен жоғары деңгейдегі қабылдау үшін алғысын білдірді.
Стратегиялық серіктестік бағыттары талқыланды
Кездесу барысында екі ел лидерлері қазақ-өзбек стратегиялық серіктестігі мен одақтастық қарым-қатынасты одан әрі дамыту жолдарын егжей-тегжейлі қарастырды. Сауда, өнеркәсіп кооперациясы, көлік-логистика, энергетика, ауыл шаруашылығы, су ресурстары және мәдени-гуманитарлық байланыстар – келіссөздің негізгі басым бағыттары болды. Сонымен бірге өңірлік және халықаралық күн тәртібіндегі өзекті мәселелер бойынша да пікір алмасылды.
Президент Қасым-Жомарт Тоқаев келіссөздер екіжақты саяси және экономикалық байланыстарды жандандыратын жаңа бағыттарды айқындағанын атап өтті.
⸻
Сауда-экономикалық ынтымақтастық: жаңа мүмкіндіктер
Мемлекет басшысы сауда-саттық көлемін арттыру үшін тауар номенклатурасын кеңейту, шикізаттық емес экспортты ынталандыру және Өзара тауар айналымын арттыру бағдарламасын сапалы жүзеге асыру маңызды екенін айтты.
Президент өңір басшыларының кеңесі, Іскерлік кеңес және «UzKazTrade» бірлескен сауда компаниясы секілді тетіктер нақты нәтижелерге жеткізуі тиіс екенін атап өтті.
⸻
Ауыл шаруашылығы мен өнеркәсіп кооперациясы
Ауыл шаруашылығы – ынтымақтастықтың ең әлеуетті салаларының бірі ретінде аталды. Қазақстан Президенті қарапайым саудадан бөлек, ет, бидай және майлы дақылдарды өңдеуден бастап толық өндірістік тізбек құруды, сондай-ақ мал шаруашылығы мен органикалық егіншілікті бірлесіп дамытуды ұсынды.
Өнеркәсіп кооперациясы – екі ел үшін стратегиялық бағыт. Қазіргі таңда жалпы құны 1,7 млрд доллардан асатын 78 бірлескен жоба жүзеге асырылуда. Бұл жобалар 15 мыңнан астам жұмыс орнын құруға мүмкіндік береді. Мемлекет басшысы олардың толық іске асуы экономикалық ықпалдастықты айтарлықтай күшейтетінін айтты.
Сондай-ақ Тоқаев «Орталық Азия» халықаралық өнеркәсіп кооперациясы орталығының құрылысын екі елдің индустриялық әлеуетін арттырудағы маңызды бастама ретінде атап өтті.
⸻
Сирек металдарды өндіру: жаңа перспективалар
Президент сирек кездесетін металдарды өндіру және өңдеу саласындағы серіктестік перспективті бағыттардың бірі екенін айтты. Жаңадан құрылатын Жұмыс тобына барлық аспектіні терең зерттеп, тиімді ынтымақтастыққа байланысты ұсыныстар әзірлеу тапсырылды.
⸻
Көлік-транзит және логистика: стратегиялық маңыз
Көлік-транзит саласындағы ықпалдастықты кеңейту – екіжақты экономикалық қарым-қатынастың кілті. Қазақстан мен Өзбекстан тарифтерді оңтайландыру, әкімшілік кедергілерді азайту, шекара маңы инфрақұрылымын жаңғырту бағытында жұмыс жүргізуде.
Президент Транскаспий халықаралық көлік бағыты, Солтүстік–Оңтүстік дәлізі және Ауғанстан арқылы өтетін теміржол бағыты бойынша ынтымақтастықты жалғастырудың өзектілігін атап өтті. Ол Өзбекстанды Ақтау және Құрық порттары арқылы логистикалық жобаларды бірге дамытуға шақырды.
Су-энергетика саласындағы ынтымақтастық
Трансшекаралық өзендердің су ресурстарын тиімді пайдалану – екі елдің тұрақты дамуы үшін маңызды шарт. Мемлекет басшысы Қазақстан мен Өзбекстан үкіметтеріне су шаруашылығы саясатындағы тәсілдерді үйлестіру бойынша жүйелі шаралар әзірлеуді тапсырды.
Қазақстан мен Өзбекстан Президенттері өткізген келіссөздер екі ел арасындағы сенімді серіктестіктің жаңа деңгейге көтерілгенін көрсетті. Сауда, өнеркәсіп, көлік, су-энергетика және ауыл шаруашылығы салаларындағы келісілген қадамдар Орталық Азиядағы интеграциялық процестерді күшейтіп, екі ел экономикасына тың серпін бермек.