Республика – ел ертеңінің кепілі
Бүгінгі таңда Қазақстан – тәуелсіз, демократиялық, құқықтық және әлеуметтік мемлекет. Бұл ұлы жетістікке жету жолында еліміз тарихи сын-қатерлерден өтті. Республика мәртебесіне ие болу – тек басқару жүйесінің өзгеруі ғана емес, сонымен бірге ел тағдырын өз қолына алу, халық еркіндігі мен теңдігін нығайту жолындағы маңызды қадам. Осы тұрғыдан алғанда, Республика – ел ертеңінің кепілі ретінде ерекше маңызға ие.
Қазақстан Республикасы Президенттік басқару формасын таңдады. Бұл жүйе елдің тұрақтылығын, біртұтастығын сақтап қалуға, басқарудың тиімділігін арттыруға мүмкіндік берді. Мемлекет басшысы Конституция кепілі ретінде халық бірлігін, адам құқықтары мен бостандықтарының сақталуын қамтамасыз етуде маңызды рөл атқарады.
Бұл мереке – мемлекетіміздің тарихи жетістіктерін ұлықтайтын, жастарды отансүйгіштікке баулитын маңызды күн. Республика күні – тәуелсіз елдің басты құндылықтары: бірлік, әділеттік, теңдік және еркіндік сияқты ұғымдарды дәріптейтін ерекше мереке.
Бұл күн – халқымыздың өз тағдырын өзі шешуге құқылы екенін, ешкімнің қысымынсыз, тек өз еркімен даму жолын таңдағанын дәлелдейді. Республика күні – өткенге тағзым, болашаққа сеніммен қарау.
Бүгінгі таңда Қазақстан жастары өз елінің патриоты, елдің ертеңіне жауапты тұлға ретінде қалыптасуда. Жастар арасында еркін ойлау, азаматтық жауапкершілік, қоғамдық белсенділік секілді құндылықтар артып келеді. Олар тек өз болашағына емес, бүкіл елдің болашағына алаңдайды. Бұл — республикалық сананың қалыптасуының жарқын көрінісі.
Республика – тек бүгінгі ұрпақтың жетістігі емес, ертеңгі ұрпақтың да үміті. Сол себепті жастарды отансүйгіштікке, ел тағдырына бейжай қарамауға тәрбиелеу – басты міндет. Жастар – елдің қозғаушы күші. Білімді, білікті, жауапкершілікті азаматтар ғана республиканың келешегін жарқын ете алады.
«Ел болам десең, бесігіңді түзе» дейді дана халқымыз. Бұл – болашақ ұрпаққа дұрыс тәрбие берудің маңызын айғақтайды. Республикалық жүйенің іргесі де – осы ұрпақ тәрбиесімен, білім сапасымен, әділеттілікке деген сеніммен нығаяды.
Қорытындылай келгенде, Қазақ елі үшін Республика – бұл жай ғана басқару формасы емес. Бұл – ұлттық болмысымызға, еркіндігімізге, әділетке деген ұмтылысымызға негізделген құндылық. Республика – елдігіміздің нышаны, тәуелсіздігіміздің тұғыры, ертеңіміздің кепілі.
Біз бүгінгі жетістігіміз үшін алдыңғы буынға алғыс айтуымыз керек. Ал болашақтың жарқын болуы – қазіргі ұрпақтың қолында. Әрбір азамат өзінің еліне, оның бүгіні мен болашағына бейжай қарамаса, Қазақстан Республикасы бұдан да биік белестерді бағындыратыны сөзсіз.
Сондықтан, Республика – ел ертеңінің кепілі екенін әрбір қазақстандық жүрегімен сезініп, оны қорғау мен дамыту жолында аянбай еңбек етуі тиіс.
Сәтбаев қаласының ішкі саясат бөлімінің сектор меңгерушісі
А.Байбуланова