2025 жыл Қазақстанда ерекше мәнге ие – бұл жыл Жұмысшы мамандықтар жылы деп жарияланды. Бұл бастама ел Президентінің еңбек нарығының заманауи талаптарына сай келетін, бәсекеге қабілетті жұмысшы кадрларын даярлауға, жастар арасында техникалық және кәсіптік мамандықтардың беделін көтеруге бағытталған маңызды қадамы болды.
Жұмысшы мамандығы – бүгінгі күннің қажеттілігі
Қазіргі заман – технология мен өндірістің, нақты әрекет пен кәсіби машықтың заманы. Бүгінгі таңда елімізде жоғары білімді мамандармен қатар, техникалық және кәсіби бағыттағы білікті жұмысшыларға деген сұраныс артып отыр. Мысалы, құрылыс, ауыл шаруашылығы, көлік, логистика, энергетика, өндіріс және өңдеу салаларында дәнекерлеуші, электрик, механик, токарь, жүргізуші, наубайшы, тігінші сынды көптеген жұмысшы мамандардың тапшылығы сезілуде.
Бұл – ел экономикасының ілгері дамуына кедергі келтіретін өзекті мәселелердің бірі. Сондықтан мемлекет жұмысшы кадрларын даярлау ісіне баса назар аударып отыр. Заманауи колледждер мен техникалық оқу орындары жаңартылып, жаңа жабдықтармен қамтамасыз етілуде. Сонымен қатар, дуальді оқыту жүйесі енгізіліп, студенттер теориямен қатар өндірістік тәжірибеден де өтіп, нақты кәсіпті меңгеруге мүмкіндік алуда.
Жастар арасында жұмысшы мамандықтарының беделін арттыру
Бүгінгі жастар көбіне жоғары оқу орындарына түсуді мақсат етеді. Алайда, жұмысшы мамандығы да табысты болашаққа жол ашатын лайықты таңдау екенін түсіну қажет. Кәсіптік білім алған жастар қысқа уақыт ішінде маман атанып, еңбек нарығында өз орнын таба алады. Оның үстіне, шебер жұмысшы әрқашан сұранысқа ие және тұрақты табысқа ие болады.
Осы орайда, Жұмысшы мамандықтар жылы аясында бүкіл еліміз бойынша түрлі іс-шаралар, кәсіптік бағдар беру жобалары, шеберлік байқаулары, өндіріс орындарына экскурсиялар ұйымдастырылуда. Бұл – жастардың жұмысшы кәсіптеріне деген көзқарасын өзгертіп, олардың болашақ мамандығын дұрыс таңдауға септігін тигізеді.
Жұмысшы – елдің тірегі
Тарихқа көз жүгіртсек, еліміздің дамуы мен өркендеуіне қарапайым еңбек адамдары – жұмысшылар үлкен үлес қосқан. Олардың еңбегі – зауыттарда, құрылыста, ауылда, кен орындарында көрініс тапты. Бүгін де жұмысшы еңбегі қоғамның негізі болып қала бермек.
Жұмысшы мамандығы – тек қарапайым кәсіп емес, ол – табандылықты, шеберлікті, жауапкершілікті талап ететін маңызды мамандық. Бұл – адал еңбекке құрмет пен мадақтың белгісі.