2025 жылғы Президент Жолдауында еліміздің дамуында жасанды интеллект (ЖИ) маңызды бағыт ретінде белгіленді. Мемлекет басшысы Қасым-Жомарт Тоқаев ЖИ мен цифрландыруды барлық салаға енгізуді, жаңа экономикалық серпіннің негізі етуді тапсырды.
ЖИ технологиялары өндіріс, ауыл шаруашылығы, білім беру, денсаулық сақтау және мемлекеттік басқаруда кеңінен қолданылмақ. Бұл ел экономикасының тиімділігін арттырып, халыққа көрсетілетін қызметтердің сапасын жақсартуға мүмкіндік береді.
Президент Жасанды интеллект және цифрлық даму министрлігін құруды ұсынды. Жаңа ведомство цифрландыру саясатын үйлестірумен және жоғары технологияларды дамытуға инвестиция тартумен айналысады. Сонымен қатар, ЖИ-ды енгізуге арналған заңнамалық және этикалық нормаларды қалыптастыру да күн тәртібіне қойылды.
Жолдауда кадр дайындау мәселесіне де ерекше назар аударылды: мектеп пен жоғары оқу орындарында “Жасанды интеллект негіздері” пәндері енгізіліп, мамандардың біліктілігін арттыру көзделіп отыр.
ЖИ — болашақтың тілі. Бұл бағыттағы нақты қадамдар Қазақстанды цифрлық инновациялар елдерінің қатарына қосып, жастарға жаңа мүмкіндік ашады.