Жұмысшы мамандықтар жылы – ел экономикасының дамуына, өндірістік әлеуеттің артуына және еңбек нарығындағы сұранысқа ие жұмысшы кадрларды даярлауға ерекше көңіл бөлінетін жыл. Бұл бастама жастарды техникалық және кәсіптік білім алуға ынталандыру, жұмысшы мамандықтарының беделін арттыру, әрі оларды заманауи талаптарға сай оқытып, жұмысқа орналастыруды көздейді.
Қазақстанда соңғы жылдары «Жайлы мектеп», «Ауыл аманаты», «Құнды кәсіп», «Тегін техникалық білім» сияқты бірқатар әлеуметтік жобалар жүзеге асырылып келеді. Осы бағдарламалар аясында колледждер мен оқу орындары жаңартылып, дуальды оқыту жүйесі енгізілуде. Бұл – студенттерге теориямен қатар практикалық дағдыларды меңгеруге мүмкіндік береді.
Жұмысшы мамандықтары – экономиканың жүрегі. Электрик, дәнекерлеуші, құрылысшы, механик, аспаз, агроном, теміржолшы сынды мамандар кез келген өндірістік немесе әлеуметтік салада үлкен рөл атқарады. Сондықтан бұл мамандықтарға сұраныс ешқашан азаймайды.
Жұмысшы мамандықтар жылын атап өту – жастарды еңбекке баулып, елдің жарқын болашағына үлес қосатын кәсіп иелерін даярлаудың маңызды қадамы. Бұл – еңбек адамына деген құрметтің көрінісі.