2025 жыл Қазақстанда «Жұмысшы мамандықтар жылы» деп жарияланды. Бұл бастаманың басты мақсаты – ел экономикасының негізі болып табылатын жұмысшы кәсіптерінің маңыздылығын арттыру, жастарды техникалық және кәсіптік білімге баулу, еңбекке құрметпен қарауға тәрбиелеу.
Қазіргі таңда еліміздің өндірістік, құрылыс, ауыл шаруашылығы және көлік салаларында білікті жұмысшы мамандарға сұраныс артып келеді. Электрик, дәнекерлеуші, механик, құрылысшы, аспаз, темір ұстасы, тігінші секілді кәсіптер – экономиканың діңгегі.
Жұмысшы мамандықтары – тек еңбек күші емес, бұл – елдің дамуына үлес қосатын, өз ісінің шебері болатын азаматтар. Сондықтан мемлекет техникалық және кәсіптік білім беруді дамытуға ерекше көңіл бөлуде: колледждерге жаңа жабдықтар алынуда, дуалды оқыту жүйесі енгізілуде, жұмысшы мамандық иелеріне гранттар мен қолдаулар қарастырылуда.
Жастарды жұмысшы кәсіптерін игеруге ынталандыру – болашақта мықты кадрлық әлеует қалыптастырудың кепілі. Әрбір кәсіптің қадірін түсініп, еңбек адамына құрметпен қарау – қоғамның дамуына жол ашады.