2025 жыл Қазақстанда Жұмысшы мамандықтар жылы деп жарияланды. Бұл бастама елдегі еңбек нарығының қажеттіліктерін ескере отырып, жұмысшы кадрлардың мәртебесін арттыру, олардың беделін көтеру және жастарды техникалық және кәсіби білімге ынталандыру мақсатында қолға алынды.
Қазіргі таңда елімізде білікті жұмысшы мамандарға деген сұраныс күннен-күнге артып келеді. Әсіресе, құрылыс, энергетика, көлік, ауыл шаруашылығы, өндіріс және IT-инфрақұрылым салаларында электрик, дәнекерлеуші, құрылысшы, жөндеу-механик, жүк тиеуші, қазандық операторы, тас қалаушы, автокөлік жөндеуші секілді мамандықтар аса қажет.
2025 жылы мемлекет тарапынан техникалық және кәсіптік білім беру ұйымдарына қолдау күшейтілді. Колледждер мен өндірістік оқыту орталықтары жаңа заманауи жабдықтармен қамтылып, дуалды оқыту жүйесі кеңінен енгізілуде. Сондай-ақ, жұмысшы мамандықтарды игерген жастарға гранттар мен жұмысқа орналасуға мүмкіндік беретін арнайы бағдарламалар іске қосылды.
Бұл жыл – тек жұмысшы мамандарға қолдау көрсету емес, сонымен бірге, олардың қоғамдағы орнын айқындап, еңбегін бағалау жылы. Жастар арасында «жұмысшы – ел тірегі» деген ұстанымды қалыптастыру – басты мақсаттардың бірі.