Қаладағы №1 жылу беру станциясына барып, атқарылып жатқан жұмыстармен таныстым.
Биыл 1-ші және 4-ші қазандықтарда күрделі жөндеу жүргізілуде. 4 қазандықтағы үш шөгінді сүзгі (грязевик) жаңасына ауыстырылып жатыр. Бұл — қазандықтардың бітелуін болдырмау үшін маңызды қадам.
Қара қар мәселесін біржола шештік деп айтуға әлі ерте. Дегенмен, биыл станциядағы төрт қазандыққа эмульгаторлар орнатылып жатыр. Бұл қондырғылар ауаға зиянды заттардың тарауын азайтып, экологияға оң әсер етеді. Әрине, ол жылу беру қуатын шамамен 15%-ға төмендетеді. Бірақ біз бұл кемшілікті толтыру үшін жылу магистральдарына күрделі жөндеу жүргізудеміз. Бұрын ескі құбырлардан жылудың 23%-ы ысырап болатын. Енді жөндеуден кейін бұл шығын едәуір азаяды деп сенеміз.
Сондай-ақ, биыл құбырларды жуып-шаю жұмыстарын қыркүйекте бастаймыз. Өткен жылы қазан айында бастап, жылу маусымына дейін судағы темірді толық тазалап үлгермеген едік. Бұл жолы мұндай қателіктерге жол бермеуіміз керек.
Біздің міндетіміз — тұрғындарға таза, сапалы әрі үздіксіз жылу беру. Осы мақсатта барлық шаралар қабылданып жатыр.