Жаз мезгілінің жақындауына байланысты ауыл шаруашылығы алқаптарында шегірткелердің көбею қаупі артып отырғанын хабарлаймыз. Ауа райының қолайлы қалыптасуы зиянкестердің жаппай таралуына әсер етуі мүмкін.
Қазақстан аумағында кең таралған қауіпті шегіртке түрлеріне азиялық шегіртке, итальяндық прус және марокколық шегіртке жатады. Аталған зиянкестер қолайлы жағдай туындаған кезде жылдам көбейіп, егістік алқаптарына айтарлықтай зиян келтіруі ықтимал.
Осыған байланысты аграрлық сала субъектілеріне төмендегі шараларды қатаң сақтау ұсынылады:
егістік және жайылымдық жерлерге тұрақты мониторинг жүргізу;
шегірткелердің дернәсілдері анықталған жағдайда дер кезінде өңдеу жұмыстарын ұйымдастыру;
фитосанитарлық қызметтермен өзара тығыз байланыста жұмыс істеу;
химиялық және биологиялық препараттардың жеткілікті қорын қамтамасыз ету;
арнайы техникалардың дайындығын алдын ала тексеру.
Шегірткелердің таралуының алдын алу мақсатында өңдеу жұмыстары олардың ерте даму кезеңінде жүргізілуі тиіс. Бұл зиянкестердің жаппай көбеюіне жол бермеудің ең тиімді тәсілі болып табылады.
Барлық ауыл шаруашылығы тауар өндірушілерін, шаруа қожалықтарын және жер пайдаланушыларды сақтық шараларын күшейтуге және жауапкершілікпен қарауға шақырамыз.
Қосымша ақпарат алу үшін жергілікті атқарушы органдарға немесе тиісті фитосанитарлық қызметтерге жүгіну қажет.
Ұлытау облысының ауыл шаруашылығы саласындағы уәкілетті органдары
