Балалардың қауіпсіздігі – кез келген қоғам үшін ең басты құндылықтардың бірі. Әсіресе білім беру ұйымдарының маңындағы жол қозғалысы балалардың өмірі мен денсаулығына тікелей әсер ететіні белгілі. Осыған байланысты қала аумағында балалардың жолдағы қауіпсіздігін арттыруға бағытталған бірқатар маңызды шаралар жүзеге асырылуда.
Атап айтқанда, қаладағы 5 білім беру ұйымының жанында «Назар аударыңыз, балалар!» жол белгілері орнатылды. Бұл белгілер жүргізушілерге оқу орындарына жақын аумақта балалардың жиі жүретінін ескертіп, сақтық шараларын күшейтуге бағытталған. Жол белгілерінің орнатылуы көлік қозғалысын реттеуге, жылдамдықты төмендетуге және жол-көлік оқиғаларының алдын алуға мүмкіндік береді.
Мұндай алдын алу шаралары балалардың мектепке қауіпсіз барып-қайтуына жағдай жасап қана қоймай, ата-аналардың да алаңдаушылығын азайтады. Сонымен қатар, бұл жұмыстар жол қозғалысы мәдениетін арттыруға және жүргізушілердің жауапкершілігін күшейтуге септігін тигізеді.
Осы орайда барлық көлік жүргізушілері мен қала тұрғындарын жолда барынша мұқият болуға, белгіленген жылдамдық режимін сақтауға және балаларға ерекше назар аударуға шақырамыз. Әрбір жүргізушінің сақтығы – бір баланың өмірін сақтап қалуы мүмкін.
Балалардың амандығы – тек ата-ананың ғана емес, бүкіл қоғамның ортақ жауапкершілігі. Сондықтан жол қозғалысына қатысушылардың барлығы бірлесе әрекет етіп, қауіпсіз орта қалыптастыруы қажет. Жас ұрпақтың қауіпсіздігі – еліміздің жарқын болашағының кепілі.
